Azərbaycan xalqı üçün 8 Noyabr Zəfər Günü təkcə bir qələbə günü deyil, milli şərəf və mədəniyyətimizin dirçəlişi deməkdir. Bu tarix Azərbaycanın Qarabağ münaqişəsində qazandığı Zəfəri qeyd edir. Qarabağ məsələsi Azərbaycan xalqının 30 ildən çox davam edən ərazi bütövlüyü uğrunda mübarizəsinin bir parçasıdır. Sovet İttifaqının dağılması ilə başlayan çətinliklər, Ermənistanın təcavüzkarlıq siyasəti və xalqımızın sarsılmaz iradəsi Qarabağ məsələsini xalqın yaddaşında daima diri saxladı. 44 günlük Vətən müharibəsi də məhz bu iradənin, birlik və qardaşlığın gücü ilə tarixi qələbə ilə nəticələndi.

Azərbaycan Ordusu, xalqın həmrəyliyi və yüksək ruhda göstərdiyi qəhrəmanlıq sayəsində 2020-ci ilin payızında böyük bir hərbi əməliyyat həyata keçirdi. İllər boyu davam edən məğlubiyyətlərə və itkilərə baxmayaraq, Azərbaycan xalqı heç vaxt ümidini itirmədi. Ordumuzun bu şanlı zəfərində texnoloji üstünlük, qətiyyətli komandanlıq və xalqın dəstəyi həlledici rol oynadı. Müharibənin hər günü, hər saatı həm döyüş meydanında, həm də informasiya cəbhəsində qələbəyə aparan yolun bir hissəsi idi. Xalqımızın bu dövrdə göstərdiyi həmrəylik və dövlətin qətiyyəti Qarabağın azadlığı ilə nəticələndi və bu uğur, yalnız Azərbaycan deyil, bütün türk dünyası üçün qürur mənbəyinə çevrildi. Bu qələbə ilə Azərbaycan xalqının əziz şüarı bir daha təsdiqləndi: "Qarabağ Azərbaycandır!"

Ali Baş Komandan İlham Əliyevin "dəmir yumruq" ifadəsi, Azərbaycanın sarsılmaz gücünü simvolizə edən əlamətdar bir ifadə kimi yaddaşlarda qaldı. Bu ifadə Azərbaycan Ordusunun işğalda olan torpaqlarımızın azad edilməsi uğrunda həyata keçirdiyi hərbi əməliyyatların adı idi. 2021-ci ildə Hadrut qəsəbəsində zəfər şəhidlərinin xatirəsinə ucaldılan "Dəmir Yumruq" abidəsi də məhz bu gücü və qətiyyəti simvolizə edir. İnşa edilmiş abidə üzərində Azərbaycan əsgərinin təsviri ilə yanaşı, Azərbaycan Silahlı Qüvvələrinin arsenalında olan pilotsuz uçuş aparatları da əks olunub. "Dəmir yumruq" yalnız Ermənistan üzərində deyil, haqq və ədalət üçün vurulmuş zərbə olaraq, milli qürurumuzun rəmzinə çevrildi.

Bu zəfərin ən simvolik məqamlarından biri, Azərbaycanın mədəniyyət beşiyi olan Şuşanın azadlığı oldu. Şuşanın azad olunması təkcə hərbi strateji üstünlük deyildi, eyni zamanda Azərbaycanın milli kimliyi, tarixi və mədəniyyətinin dirçəlişinin rəmzidir. Şuşa Qarabağ münaqişəsi müddətində ermənilərin mədəniyyət abidələrimizə və tarixi irsimizə olan təcavüzünün şahidi oldu. Şuşanın azad edilməsi, bu tarixi abidələrin yenidən Azərbaycan xalqına qaytarılması və mənəvi olaraq xalqımızın öz mədəniyyətinə sahib çıxmasının bir göstəricisidir.

8 Noyabr Zəfər Günü həm də Azərbaycanın beynəlxalq arenada qazandığı uğurlara işıq salır. Türkiyə və digər qardaş ölkələrin dəstəyi, dünya ictimaiyyətinin Azərbaycanın haqq mübarizəsinə yönələn baxışı Azərbaycan-Türkiyə qardaşlığını daha da möhkəmləndirdi. Azərbaycan və Türkiyə arasındakı bu dərin qardaşlıq bağları hər zaman "1 millət, 2 dövlət" prinsipi ilə qüvvətlənib. Bu qələbə Azərbaycan və Türkiyənin qardaşlıq və dostluq əlaqələrinin nə qədər möhkəm olduğunu bir daha sübut etdi. Bu iki dövlət arasındakı güclü dostluq gələcək nəsillərə örnək olacaq və Cənubi Qafqazın təhlükəsizliyinə mühüm töhfələr verəcəkdir.

Azərbaycan xalqı üçün 8 Noyabr sadəcə bir tarix deyil, bu gün hər il milli qürur və birlik günü olaraq qeyd ediləcək. Bu gün xalqımızın sarsılmaz iradəsi, qüruru və əzmi nəsildən-nəslə ötürüləcək. Qarabağda baş verən bu qələbə Azərbaycanın müstəqilliyini və suverenliyini təmin edən bir rəmzdir və Azərbaycanın gələcək inkişafına və güclənməsinə ilham mənbəyi olacaq. Gələcəkdə bu günü hər zaman qalib bir xalqın nişanı olaraq yadda saxlayacağıq. Belə bir günü qeyd etdiyimiz üçün çox qürur duyuruq.